LEGAZPI CITY—Ipig-implementar ngonian an alternative mode of learning sa mga eskwelahan sa Albay makalihis na isuspendir an face-to-face classes sa nagkapirang lugar huli sa epekto kan shearline asin bagyong Wilma.
Segun ki Schools Division Office Albay Spokesperson Froilan Tena, sa intrevista kan Bombo Radyo Legazpi, ipigkundusir an asynchronous learning sa paagi kan pag-send nin modules sa social media messaging app, asin isusumiter an mga nasimbagan na materyales pagbalik liwat sa face to face na klase.
Kun an nagsuspendir suboot kan klase an lokal na gobierno an digdi hahalaton an pag-lift kan suspension; alagad kun gobierno provincial an nagsuspendir an digdi man hahalaton an pag-lift kan suspension nin klase.
Mientrastanto sinabi man kan opisyal na posible man na gigibohon an mga Christmas party sa mga eskwelahan sa pang-tolong semana kan Disyembre.
Mensahe man ni Tena sa mga estudyante na gibohon an ipig-send na modules sa saindang group chats, asin nagpagirodom man ini sa mga magurang na bantayan asin tawan giya an saindang mga aki nganing magibo ninda an saindang mga gibohon sa eskwelahan.
