LEGAZPI CITY-Gadan an duwang soldados sa engkwentro kan tropa kan gobyerno asin mga miembros kan Communist-NPA-Terrorists (CNTs) sa Barangay Babaklayon, San Jose De Buan, Samar.
Basado sa ipinaluwas na report kan Philippine Army (PA), pwersahan na sinasakop kan mga rebelde an nagkapirang pribadong propiedad sa nasabing barangay, asin ginagamit ining taguan, malinaw na pagbalgar sa International Humanitarian Law (IHL).
Nagpadara nin mga suldados an 8th Infantry Division ngani na isagibo an validation kan nasabing report alagad pag-abot sa lugar, suboot pinaputukan sinda kan mga rebelde, sa ibong kan presensya kan mga sibilyan.
Sa suminunod na bakbakan, duwang soldados an nagadan mantang tulos man na nagdurulag an mga rebelde.
Nagpapadagos pa an pursuit operations kan mga otoridad mapadapit sa insidente.
Nagluwas man na sarong sibilyan an nairido sa riribayan nin putok, alagad nasa marhay na ining kondisyon.
Mientrastanto, nagpromesa an Philippine Army nin magkakanigong ayuda sa mga nawalat na pamilya kan duwang soldados siring man an makakaresibe nin bilog na onra hale sa mga militar an duwang soldados na nagadan.
