LEGAZPI CITY – Pigpo-problema ngonian kan Waterworks Sto. Domingo, Albay an mga basurang nakatambak sa mga drainage system kan saindang banwaan.
Segun ki Waterworks SDA Complaint Officer Richelle Bautista sa intrevista kan Bombo Radyo Legazpi na nahihiling nindang rason an mga basura kun nyata nagkakapurutol asin nagkakararaot an saindang mga water-hose.
Alagad punto niya na marhay man an collection nin basura sa saindang banwaan kun kaya palaisipan sa sainda an padagos na pagtapok nin basura sa mga drainage system.
Kahagadan ninda an disiplina kan saindang mga namamanwaan huli ta kun mabubugtak suboot sa tamang tapukan an mga basura an dakulang tabang ini nganing malikayan an pagkaraot mga hose o tubo naghahatod nin tubig sa mga kaharongan.
Pigtaram pa kan opisyal na mano-mano na sanang pighahale kan saindang mga personahes an mga nakatambak na basura nganing maparahay tulos an mga apektadong linya asin malikayan man an pagbabaha tuyong igwa nin pag-uuran.
Afuera sa mga basura an pig-tatawan na man ninda nin magkakanigong aksyon an mapadapit sa mga ilegal na koneksyon nin mga tubo saro man sa rason kan maluyang supply nin tubig.
Sa ibong kaini an pigsyerto ni Bautista na piggigibo kan saindang manhamiento an gabos nganing matawan nin maray na serbisyo an saindang miembros konsumidores maski suboot pigbabasol an iba sa sainda enkaso warang supply nin tubig sa Sto. Domingo, Albay.
