LEGAZPI CITY – Pigkokonsidera kan mga kapulisan sa Albay na genarally peaceful an ginibong hiro protesta sa ciudad kan Legazpi kan pirang grupo nganing kondenahon an nangyayaring korapsyon sa gobierno.
Segun ki Albay Police Provincial Office Provincial Director Police Colonel Noel Nuñez na magayon an nagin koordinasyon sainda kan mga organizers nganing mapa-otob an pazy orden sa kasagsagan kan saindang aktibidad.
Huli suboot sa pagigin organisado asin disiplinado kan mga ralihista an wara sindang nairehistrong dae piglalaomang insidente mantang dae man ninda pigproblema an kamugtakan kan trapiko huli ta nagbibigayan an mga ralihista asin behikulo kan tinampo.
Alagad sa ibong kan katuninongan kan protesta an mahigot pa man nindang ipinaotob an maximum tolerance asin pagtatao nin maray na seguridad bako sana sa mga nakisumaro sa aktibidad kundi pati na man sa enterong provincia.
Pigtaram pa kan opisyal na direkta na siyang nakipag-olay sa mga organizers nganing maaraman ninda na katuwang ninda an mga kapulisan na mamantenir an seguridad asin pazy orden sa pagbuyagyag kan saindang mga agrangay sa gobierno.
Uminabot man sa 200 na kapulisan an nagbantay sa enterong durasyon kan aktibidad asin sa presente suboot an naghahalat sinda nin abiso kun nuarin ibababa an alert status alagad piglalaoman nindang ngonian na aldaw urog nang nagin magayon an saindang assessment sa nangyaring rally.
Pagsyerto man ni Nuñez sa publiko na siring kan ipina-otob kan kapulisan sa nangyaring hiro protesta an magpapadagos man an pagpapa-otob ninda kan pazy orden sa provincia kan Albay ngonian na bulan nin Disyembre.
