LEGAZPI CITY – Pigpo-problema ngonian kan konseho kan Barangay Taysan, Legazpi City an kakulangan sa supply nin tubig sa saindang lugar.
Segun ki Kagawad Emma Jadie sa intrevista kan Bombo Radyo Legazpi na huli ta nakatugdok an saindang barangay sa halangkaw na parte kan ciudad an pigtatawan prayoridad kan Legazpi City Water District an sarong village sa saindang lugar.
Alagad paglilinaw niya man na dae man sinda nagpapabaya na matawan nin sulusyon an agrangay kan saindang nasasakupan.
Nagtatao man suboot nin rasyon nin tubig an Legazpi City Water District asin Bureau of Fire Protection partikulamente na sa saindang purok na dae na pig-aabot kan rotational na pagkakaigwa nin water supply sa mga gripo.
Pighihiling man na rason kan opisyal sa haros sarong taon nang kakulangan nin supply kan tubig sa saindang barangay iyo an dakulang populasyon.
Padagos man an saindang pakikipag-koordinar sa manhamiento kan Legazpi City Water District asin sa lokal na gobierno nganing madangog an saindang agrangay.
Sa presente an pighahalat nindang makaabot sa saindang barangay an water supply na hale sa southern barangays kan ciudad siring kan Barangay Buenavista asin Barangay Cagbacong.
Pangapodan ni Jadie sa saindang mga residentes na mag-arok na muna sa mga bubon o deep well mantang pigagibuhan ninda nin lakdang kun papano makahabot sa saindang kaharongan an matanos na supply nin tubig.
