LEGAZPI CITY—Irido an driver kan trailer truck asin ngonian an yaon sa ospital makalihis na buminangga sa sarong pampasaherong van sa Barangay Libod, Camalig, Albay.
Magigiromdomang onse sa mga pasahero kan van an kumpirmadong binawian nin buhay, mantang nakaligtas an 3 inidbidwal kun sain saro an gikan sa van, siring man an drayber asin pahinante kan nasabing truck.
Segun ki Albay Police Provincial Office Provincial Director Police Colonel Noel Nuñez, sa intrevista kan Bombo Radyo Legazpi, posible suboot na mahampang sa kasong Reckless Impludence Resulting to Multiple Homicide and Damage to Property an drayber kan trailer truck.
Basado sa saindang imbestigasyon na nawaran suboot nin preno an truck sa parte kan bypass road sa nasabing lugar asin bahagyang nagliko na nagresulta sa head-on collision sa sarong pampasaherong van na may rutang Nabua-Legazpi hasta sa mahulog ini sa sarong bangin.
Dugang kan opisyal na kargado suboot an truck nin mga kagamitan sa peryahan.
Nagpapadagos man an pagkua ninda sa mga detalyes kan mga indibidwal na binawian nin buhay.
Mientrastanto, abiso kan opisyal sa mga drayber na magin responsable sa saindang pagmamaneho asin pigdadarang behikulo, siertohon na nasa tamang posisyon an lunadan asin sinda mismo an nasa maayos na kondisyon.
Siring man an paggiromdom kan BLOWBAGETS (Battery, Lights, Oil, Water, Brake, Air, Gas, Engine, Tire, and Self) orog na kun mabiyahe.
