LEGAZPI CITY – Nagbarewas nin mga paroy asin mga pataba an lokal na gobierno para sa mga kwalipikadong paraooma sa Camalig, Albay.
Segun ki Mayor Caloy Baldo sa intrevista kan Bombo Radyo Legazpi na napapanahon an saindang programa para sa mga namamanwaan nindang paraooma urog na ngonian na planting season asin makalihis an pangrarapado ni bagyong Uwan.
Uminabot man sa labi 700 na mga paraooma an nakaresibi ninda mga paroy mantang nangapodan sa iba pang paraooma na makipagkoordinar sa saindang Municipal Agriculture Office nganing makabale an mga ini sa masunod na batch kan saindang programa.
Dakulang tabang suboot an ipigtaong asistensya kan lokal na gobierno sa mga paraooma huli sa labing halangkaw ngonian kan presyo kan mga abono asin mga pananom na paroy na pwedesir maka-apektar sa saindang produksyon.
Pigpa-plano man kan opisyal na magpatugdok nin rice mill kun sain direkta nindang babakalon an mga inaning paroy kan mga paraooma asin an mga ipo-produsir na mga bagas an iaalokar nganing maibarewas sa namamanwaan tuyong igwa nin kalamidad.
Sa siring suboot kaining paagi an matatabangan ninda an mga paraooma na maipabakal sa halangkaw na kantidad an saindang mga inaning paroy na saro sa mga problemang pigkakahampang ninda ngonian.
Nangapodan man si Baldo sa saiyang nasasakupan na magtarabangan nganing makabangon liwat an banwaan hale sa ipigwalat na distroso kan mga nakaaging raot nin panahon.
