LEGAZPI CITY—Padagos na imo-monitor kan mga kapulisan sa banwaan kan Tiwi, Albay an estado kan paggamit o pagpabakal nin ilegal na droga sa mga barangay sa ibong kan pigdeklarar sa banwaan bilang drug-free municipality.
Segun ki Tiwi Municipal Police Station Chief of Police Police Major Christian Brual, sa intrevista kan Bombo Radyo Legazpi, mas magigin mahigot sinda sa monitoring sa mga barangay-level en kaso may mga drug personality o drug pusher na gikan sa ibang lugar na malaog sa banwaan kan Tiwi.
Pakukusogon man ninda an barangay intelligence network asin community awareness nganing maipaaram sa saindang opisina en kaso man na may mga indibidwal na imbuelto sa ilegal na droga.
Enot soboot nindang gigibohon an pakikipagkoordinar sa mga opisyales kan lambang barangay huli sa sinda an mas nakakakaaram kun sisay an mga drug personality sa saindang nasasakupan.
Mientrastanto, nagpapasalamat man si Brual sa mga sakripisyo kan mga barangay officials na nagtabang sainda nganing maguno an drug-cleared status kan nasabing banwaan.
