LEGAZPI CITY—Karsel an bagsak kan sarong babae sa ikinundusir na buy-bust operation kan Philippine Drug Enforcement Agency asin Guinobatan Municipal Police Station sa Purok 4, Sitio Ogsong, Barangay San Jose sa banwaan kan Guinobatan, Albay
Segun ki Philippine Drug Enforcement Agency Albay Provincial Officer Noe Briguel, sa intrevista kan Bombo Radyo Legazpi, binisto an suspek na si alyas “Princess”, residente kan provincia nin Camarines Sur, asin napag-araman na saro ini sa nagpapabakal o nagdadara nin ilegal na droga sa nasambitang banwaan.
Naarestar ini sa paagi kan saindang duwang undercover agent kun saen nakabakal sinda nin nasa pocomas o menos 100 gramos nin pigtutubudang shabu na may estimated street value na labi P437,000 o standard value na P683,000.
Sa presente nasa kustodiya kan PDEA Regional Office an suspek, siring man na nasa proseso na nin pagsunad nin kaso an mga otoridad asin isasairarom an suspek sa inquest proceedings kun saen posibleng mahampang ini sa pagbalgar sa Sections 5, 11, and 12, kan Article II kan Republic Act 9165 o Comprehensive Dangerous Drugs Act of 2002.
Dugang kan opisyal na basado sa validation process kan saindang agents na an modus suboot kan suspek an mapasiring sa Guinobatan nganing magbarewas nin ilegal na droga asin mahale na makalihis an saiyang pagkolektar.
Mientrastanto, abiso man ni Briguel sa publiko na magin mapagmatyag sa palibot asin ipag-report sa magkakanigong ahensya en kaso may mabaretaan nin mga naiimbuelto sa ilegal na droga nganing mapoho na an mga personang nadadawit sa siring na gibo
