LEGAZPI CITY-Isinangat ngonian na aldaw kan abogadong si Atty. Eldrige Marvin Aceron an nagkapirang reklamong administratibo asin kriminal laban kay Senator Chiz Escudero sa Office of the Ombudsman.
An mga reklamo an may kinaaraman suboot sa salang paggamit kan pondo asin korapsyon kan senador kan siya an gobernador pa sana kan Sorsogon.
Partikular na sa ipigsangat na reklamo an suboot pagbayolar sa RA 3019 o an Anti-Graft and Corrupt Practices Act, Technical Malversation, Frauds Against Public Treasury, asin an Falsification of Public Documents.
Afuera kay Sen. Escudero, kairiba man sa ipigrereklamo kan abogado an mga miyembro kan Bids and Awards Committee, Provincial Accountants, Provincial Treasurer asin iba pang opsiyal sa banwaan kan Sorsogon.
Segun sa abogado, an reklamo an resulta kan saiyang pagbusisi sa ipinaluwas na Commission on Audit Annual Audit report kan Sorsogon kan taong 2021.
Sinabi pa niya na posibleng magabot sa labi P352-Milyon an kantidad kan saiyang nanotaran suboot na korapsyon o sistematikong iregularidad asin salang paggamit sa pondo kan Sorsogon kan gobernador pa sana an nasabing mambabatas.
