LEGAZPI CITY – Nagpapadagos an pagbabarewas kan Albay Provincial Social Welfare and Development Office nin mga relief support makalihis an pangrarapado ni Bagyong Uwan.
Segun ki Albay PSWDO Head Ma. Vivien Cea sa intrevista kan Bombo Radyo Legazpi na maabot na sa haros patapos na sinda sa pagtatao nin tabang sa gabos na munisipalidad asin ciudad sa enterong provincia afuera pa sa banwaan kan Rapu-Rapu na nakatalaang magresibi ngonian na aldaw.
Nagin marikas suboot an pagbabarewas huli sa stockpiling kan lokal na gobierno partikulamente na an mga bagas asin an augmentation support na hale man sa Department of Social Welfare and Development.
Pagdoon niya man na wara mang patod an saindang monitoring nganing masyerto na mareresibi kan mga Albayano an mga tabang na ipigtatao kan gobierno tuyong igwa nin kalamidad.
Paglalaoman man ni Cea na ngonian na aldaw an 100% nang matapos an relief distribution urog nang saro an provincia sa enot na nakamate kan epekto kan naunambitang raot nin panahon.
Mientrastanto, pigtaram pa kan opisyal na nagpapadagos an ika-tulong aldaw kan payout para sa social pension kan mga senior citizens ngonian na aldaw sa Bacacay, Albay.
