LEGAZPI CITY—Nagtitinir na isolated an nagkapirang barangay sa Catanduanes makalihis an pangrarapado kan bagyong Uwan sa isla provincia.
Segun ki Provincial Disaster Risk Reduction and Management Office Catanduanes Emergency Operations Chief Roberto Monterola, sa intrevista kan Bombo Radyo Legazpi, na an mga ini an dae pa naa-access asin nadadarahan nin tabang hasta sa ngonian kawsa kan landslide sa lugar.
Nakatalaan man suboot na ire-assess kan Philippine Air Force an mga isolated na lugar nganing maski papano an makaabot na digdi an mga relief goods.
Dugang ni Monterola na sa presente kinakaipuhan kan namamanwaan sa Catanduanes an food packs, suplay nin malinig na tubig, asin iba pa.
Segun pa sa saiya na pocomas o menos 58,000 pamilya o labi sa 190,000 indibidwal an apektado kan nasabing bagyo sa provincia.
Mientrastanto, pig-asigurar man kan opisyal na piggibo kan lokal na gobierno an gabos na lakdang nganing maabutan ninda nin tabang an saindang nasasakupan.
