LEGAZPI CITY – Dae na pigproblema kan Pioduran Municipal Disaster Risk Reduction and Management Office an mapadapit sa pagpapa-ebakwar sa saindang mga residentes huli sa epekto ni Super Typhoon “Uwan”.
Segun ki Pioduran MDRRMO Head Noel Ordoña sa intrevista kan Bombo Radyo Legazpi na poon pa kasuhapon an nagin puga-puga an saindang evacuation efforts partikulamente na an mga nasa vulnerable population.
Nakapreparar man an saindang augmentation team katabang ang Philippine Army nganing marespondehan an saindang namamanwaan na nangangaipuhan nin tabang.
Dae man ninda ini pigpo-problema an pagbabaha huli ta nagsagibo na sinda asin saindang mga residentes nin clearing operation sa mga kanal pirang semana antes an paghagupit kan nasabing raot nin panahon.
Pigtaram pa kan opisyal na huli ta pigkokonsidera na catch basin an saindang banwaan pwedesir na magbagsak an mga dike enkaso dakol an ibabagsak na mga tubig-uran na hale sa mga kabuludan.
Pigkakahandalan niya man na kun magpapadagos an mga makukusog na pag-uuran an posibleng dae maagihan an kakalsadahang nagkokonektar sa saindang banwaan asin Ligao na makaka-ulang man sa paghahatod nin anumang tabang sa sainda.
Pigsyerto niya man na may naka-preposition na foodpacks hale sa Department of Social Welfare and Development asin gobierno provincial mantang may naka-alokar nang pondo para sa siring kaining sitwasyon.
Pigdoon man ni Ordoña na dae ninda tutugutan na makauli an mga evacuees sa saindang mga harong hangga’t dae nagmamaray an kamugtakan kan panahon sa saindang lugar.
