LEGAZPI CITY – Puga-puga an preparasyon kan Gobierno Provincial kan Catanduanes katakod kan pig-aantisiparan na pagrapado ni typhoon Uwan.
Segun ki Governor Patrick Azanza sa intrevista kan Bombo Radyo Legazpi na maski permihan sindang maka-eksperyensya nin bagyo an dae pa man sinda nagpapakampante huli ta gabos na mga raot nin panahon an pwedesir maka-apektar sa saindang namamanwaan.
Naka-preposition na man an mga Department of Social Welfare and Development foodpacks sa kaniya-kaniyang munisipalidad nganing tulos na magamit enkaso kaipuhanon mantang igwa man an saindang ofisina na handang ibarewas sa anumang oras.
Nakapagpaluwas na man suboot sindang kasuguan na pagsasagibo nin pre-emptive evacuation partikulamente na sa mga low-lying areas mantang pigpapa-otob na an “no sailing policy” para sa mga parasisira asin mga suspensyon nin klase asin trabaho.
Pigtaram pa kan opisyal na padagos an saindang koordinasyon sa manlain-laing law enforcement agencies nganing magtabang sa oras na mamatean na sa saindang provincia an epekto kan nasabing raot nin panahon.
Piglalaoman ninda na maabot sa 19,000 na indibidwal an pwedesir na mai-ebakwar sa mga masunod na oras mantang paparani an bagyo sa rehiyon kan Bicol alagad enkaso maglala suboot an sitwasyon, pwedesir ining umabot sa 40,000-50,000 na pamilya an maapektaran.
Hagad man ni Azanza an kooperasyon kan saindang mga residentes asin mga opisyales kan gobierno mapadapit sa mga lakdang sa panahon kan kalamidad nganing ma-otob ninda an zero casualty sa provincia.
