Nagle-lettering nin lapida sa kamposanto, pigkokonsiderang “ataman” an puntod na saindang naseserbisyuhan

LEGAZPI CITY – Pigkokonsidera kan sarong nagle-lettering sa kamposanto na ataman an mga puntod na saiyang piglilimpyahan sa ciudad kan Legazpi.

Segun ki Nancy Bolahim na 15 taon nang naglelettering sa mga puntod sa intrevista kan Bombo Radyo Legazpi na ataman o alaga na an saindang inapod sa saindang naseserbisyuhan huli ta ini na an nakasanayan kan mga naenot pa saiya.

Maski suboot nade-delay an bayad sa sainda an pighihingoa pa man ninda na linigan an puntod kan saindang mga ataman mantang pigkokontrata niya na man an mga ini nganing bakalon an mga burak na tinda kan saiyang aki nganing ibugtak sa mga puntod.

Nag-aamay man siya na mag-lettering kan mga puntod huli ta mawot niya na bago pa man umabot an mga kapamilya kan saiyang mga ataman an malinig na an mga ini asin wara nang po-problemahon.

Pigtaram pa ni Bolahim na huli ta igwa na siya ngonian nin kamatean, an mga aki niya na an nagpapadagos kan saiyang napunan na paglinig sa saindang mga ataman.

May mga cemetery-goers man suboot na personal pa siyang pighahanap nganing linigan an puntod kan saindang namaaram na padangat sa buhay.

Huli man sa saiyang trabaho an may kapamilya na kan saiyang mga ataman an nagsusuporta sa saiyang pagpapabulong asin maintenance kun kaya hangga’t nabubuhay siya an magpapadagos siya sa paglettering kan mga puntod.