LEGAZPI CITY—Naka-heightened alert status mula kahapon hanggang Nobyembre 4 ang Coast Guard Bicol bilang bahagi ng kanilang Oplan Biyaheng Ayos: Undas 2025.
Ayon kay Coast Guard District Bicol Public Information Officer Coast Guard Ensign Alyssa Novie Bermal, sa panayam sa Bombo Radyo Legazpi, mahigpit nilang ipinapatupad ang no overloading policy gayundin na mayroon silang random inspection sa mga barko.
Aniya na ang kanilang inilatag na mga tauhan sa mga pantalan ay magbibigay asistensya sa mga pasahero, magmo-monitor ng mga loading at unloading na mga barko, at magpatupad ng security inspection upang matiyak ang buong kaligtasan ng mga biyahero ngayong Undas.
Sa kasalukuyan ay may mahigit 589 na coast guard personnel ang naka-deploy sa mga pantalan ng rehiyon ng Bicol.
Ayon pa sa opisyal, nakapagtala na sila ng mahigit 3,000 pasahero sa unang araw ng operasyon at inaasahang mas dadami ang pasahero simula ngayong Biyernes, Oktubre 31.
Dagdag pa ni Bermal na patuloy ang kanilang K9 inspection, baggage Xray screening, at iba pa kung saan katuwang nila ang Philippine National Police Maritime Group, Philippine Drug Enforcement Agency at Philippine Ports Authority upang walang ilegal na droga o kontrabando ang makapasok sa pantalan ng Bicol.
Abiso nito sa publiko na sundin ang mga safety protocol at makipag-ugnayan sa mga awtoridad upang matiyak na maayos ang kanilang mga biyahe.
