LEGAZPI CITY – Piglalaoman na ngonian kan mga otoridad an pagruso kan publiko sa mga pribado asin pampublikong sementeryo sa ciudad kan Legazpi katakod kan pag-obserbar kan Undas.
Huli kaini an pigsyerto na ni Legazpi City Public Safety Office head Octavio Rivero sa intrevista kan Bombo Radyo Legazpi na preparado na an saindang personahes nganing ideploy sa manlain-laing kamposanto nganing magmando sa sitwasyon kan trapiko asin nganing matawan nin seguridad an mga mabisita sa puntod kan saindang mga mahal sa buhay.
Liwat niya man na pigpagirumdom sa mga kagsadiri nin behikulo na dae magparada sa ipinagbabawal na lugar nganing malikayan an pagkakaigwa nin penalty.
Paglinaw niya man na dae sinda madeploy kan saindang personahes sa mga sementeryong yaon sa southern part kan ciudad huli sa huma sa saindang seguridad.
Pigtaram pa kan opisyal na magtatarabangan an saindang ofisina kabale an mga barangay tanod, Philippine National Police, Emergency Quick Response Team, Bureau of Fire Protection, asin Philippine Coast Guard nganing magtao nin seguridad sa mga cemetery goers.
Pagdoon niya man na tututukan ninda an magigin gabat kan trapiko sa kakalsadahan poon sa Pristine Memorial Gardens pasiring sa Bicol Memorial Park asin dae ninda papalagpason an siisay man na mag-i-illegal parking.
Dae man ninda pagbabawalan an pagtitienda sa palibot kan mga kamposanto alagad syertuhon sana suboot na dae sinda makaka-ulang sa mga agihan asin tinampo nganing malikayan an anoman na dae piglalaoman na insidenteng pwedesir nindang ka-imbweltuhan.
Pagirumdom ni Rivero sa mga mabisita sa saindang namaaram nang padangat sa buhay na mag-ingat mantang patanid niya man sa mga tricycle driver sa ciudad na maninimbag sinda enkaso may magdulok saindang biktima nin overcharging.
