LEGAZPI CITY—Preparado na an kapulisan kan ciudad nin Tabaco sa pag-asigurar kan seguridad kan publiko ngonian na pag-obserbar kan Undas.
Segun ki Tabaco City Police Station Chief of Police Station Police Lieutenant Colonel Edmundo Cerillo Jr., sa intrevista kan Bombo Radyo Legazpi, katabang ninda sa pagmantenir nin paz y orden an lokal na gobierno, barangay officials, barangay tanod, public safety office asin iba pang non-governmental organization.
Kumpleto na suboot an deployment kan mga saindang mga personahes na ibubugtak sa manlaen-laeng kamposanto sa ciudad.
Abiso man kan opisyal sa namamanwaan na dapat i-asigurar na secured an saindang harong bago magpasiring sa kamposanto asin dapat may nawalat man giraray na persona sa harong nganing may tagabantay kan saindang mga ekipahe.
Kun dae man suboot mai-ibitaran na magdara nin mga aki sa kamposanto an dapat igwa sinda nin ID card na may nakabugtak kan saindang pangaran, pangaran kan magurang, contact number, asin address, nganing en kaso man na mawara sinda an madali tulos ining mahanap kan mga otoridad.
Dugang niya na dae na magdara nin mga ipigbabawal na gamit sa laog kan kamposanto siring kan deadly weapons, mga arak asin sigarilyo nganing magin matoninong an pag-obserbar kan Undas sa nasabing ciudad ngonian na taon.
