LEGAZPI CITY—Nirespondehan kan mga otoridad an enot nang nai-report na nawawarang motorsiklo sa ciudad kan Tabaco.
Segun ki Tabaco City Police Station Chief of Police Station Police Lieutenant Colonel Edmundo Cerillo Jr., sa intrevista kan Bombo Radyo Legazpi, may nag-report suboot na sarong menor de edad na lalaki sa saindang naka-duty na kapulisan sa merkado na nawawara an saiyang motorsiklo.
Basado suboot sa salaysay kan lalaki, na pasado alas-6:00 nin banggi kan Oktubre 26, kan saiyang ipinarada an motor sa pigtutukdo niyang pinaradahan, alagad pagbalik niya nin pasado alas-9 nin banggi an nawara na suboot ini sa nasabing lugar.
Huli digdi tulos ining ini-report sa mga otoridad asin pinaghahanap an naunambitang behikulo antes na makua ini pasado alas-9:40 nin banggi sa balyong kalye harani sa saiyang pwinestohan sa Barangay Quinale sa naunambitang ciudad.
Dugang pa kan opisyal na haros magkapareho suboot an merchandise store kun saen ipinarada kan lalaki an saiyang motor, kun kaya pagbalik suboot kaini an iba na an dinumanan na kalye imbes na sa orihinal na lugar kun saen siya nagparada.
Pagdugang ni Cerillo na posibleng napanlingaw suboot an lalaki huli sa dayo man sana ini sa lugar.
