Nagpahiling liwat nin tulong saradit na pagsabog an Taal Volcano kasubagong dominggo nin pagka-aga, Oktubre 26, 2025, segun sa Philippine Institute of Volcanology and Seismology (Phivolcs).
Basado sa ahensya nairehistro an enot na phreatic eruption kasubagong alas-2:55 nin maagahon.
Sinundan ini nin duwang phreatomagmatic eruptions bandang alas-8:13 asin alas-8:20 nin pagka-aga.
An namateang phreatomagmatic eruptions an kawsa suboot kan pagsabatan kan magma asin tubig sa bunganga ng bulkan, mantang an phreatic eruption an kawsa kan steam explosion kapag pinainit kan magma an daga o tubig sa ibabaw kan bunganga kaini.
Naobserbaran man kan IP asin thermal cameras kan Phivolcs an pag-luwas kan dakulang abo na uminabot sa 1,200 sagkod 2,100 metro hale sa ibabaw kan crater kan bulkan.
Mientrastanto, mantenidong nasa Alert Level 1 an Bulkang Taal, kun saen mahigot na ipinagbabawal an paglaog sa Permanent Danger Zone (PDZ) kan isla, pagbangka sa lawa, asin paglupad nin eroplano harani sa bulkan.
Nagpapatanid man an ahensya sa posibilidad nin steam-driven o phreatic explosions; mga pagyugo; minor ashfall; asin nakakagadan na mga gas hale sa abo kan bulkan.
Magigirumduman na kan Sabado, Oktubre 25, nagkaigwa man nin menor na phreatomagmatic eruption an Taal na naghaloy nin tolong minuto, na sinabayan kan 9 volcanic earthquakes asin 436 na tonelada nin sulfur dioxide emission.
.){kind=link}