LEGAZPI CITY- Sinierto kan Philippine Drug Enforcement Agency Bicol na magpapadagos an pagbabantay kan ahensya sa mga matatawong lugar siring kan mga terminal asin pantalan durante kan obserbasyon kan Undas.
Obheto kaini na maasegurar na warang makakapuslit na mga illegal drugs palaog o paluwas sa rehiyon.
Segun ki PDEA Bicol spokesperson Carlo Fernandez na mawot man nindang masierto na an mga drivers an malinig sa impluwensya kan iligal na droga ngani na magtenir na salbado an mga pasahero.
Paliwanag kan opisyal na pinag-aantisiparan an pagruso kan mga tawo sa mga ports asin terminals kaya malatag nin mga tauhan an ahensya kaibanan an saindang mga K-9 dogs.
Nangapudan man si Fernandez sa publiko na padagos na makipag koordinar sa ahensya asin dae matakot na magtao nin impormasyon kun igwang mga naaaraman dapit sa mga personang imbwelto sa kalakaran kan iligal na droga.
