Sinunadan ngonian na aldaw, ika-20 kan Oktubre si dating Ilocos Sur Governor Chavit Singson nin pirang mga reklamo katakod sa isyu kan korapsyon mapadapit sa lugar kaining minsa’y pinangenotan.
Personal na isinunad kan abogadong si Atty. Estelita D. Cordero, lider kan grupong Warriors Ti Narvacan, an reklamong plunder sa Office of the Ombudsman laban sa dating akalde kabale pati Vice Mayor kaini si Pablito Sanidad Sr. asin iba.
Basado sa reklamo, alegasyon ninda na nagkaigwa suboot nin sabwatan sa bakalan o pagbakal kan Munisipalidad kan Narvacan sa sarong lote sa saindang lugar.
Nagtutubod an grupo na an mga sinunadan nin reklamo an nagkaigwa nin kuntsabahan sa pagbakal nin nasa 99,000 square meters na daga sa kantidad na labi P140-million na kun ikukumpara sa zonal value an nasa 49-milyon Piso sana suboot.
Huli kaini nanindugan sindang ini an pagbayolar sa Republic Act No. 7080 kan Plunder Law huli ta nabakal nin overpriced asin kulang-kulang 100-milyon piso ill-gotten wealth man kun maikokonsidera.
Afuera pa digdi, kasabay man na isinunad kan complainant na si Atty. Estelita D. Cordero an reklamong pagbayolar man sa Anti-Graft and Corrupt Practices Act o an Republic Act No. 3019 laban pa man kay fomer Narvacan Mayor Chavit Singson.
Alegasyon ninda sa graft complaint an ilegal na pag-okupa asin pagsasapribado sa sarong parte kan baybayon sa Sulvec, Narvacan, Ilocos Sur na dae naghaloy an nabisto bilang ‘Santorini’.
Digdi man ninda ipigdoon na wara suboot na permit an pagpapagibo sa nasabing resort asin dae nakakuwa nin environmental clearance.
Kun kaya kahagadan sa isinunad na reklamo an pagpapawarang bisa sa nangyaring ilegal na bakalan pati an demolisyon sa nasabing istraktura.
Kabale man sa kahagadan an nakapalaog sa reklamong isinunad magin an pagsasagibo nin lifestyle check para sa dating opisyal kan Narvacan.
