Naipaabot na kan Department of Social Welfare and Development (DSWD) ang haros nasa P720,925 na pangenot na tabang sa mga pamilyang naapektaran kan Bagyong Ramil, segun ki Assistant Secretary Irene Dumlao.
An nasabing tabang an kompwesto nin 382 family food packs (FFPs) asin 547 ready-to-eat food (RTEF) boxes na ipigbabarewas sa mga apektadong lugar.
Segun ki Dumlao, katabang kan DWSD an mga lokal na gobierno sa pagtao nin tabang, alinsunod sa direktiba ni Presidente Ferdinand Marcos Jr.
Basado sa reports, nag-abot na sa 14,500 pamilya o 30,368 indibidwal hale sa 147 barangay sa mga rehiyon kan Cagayan Valley, Central Luzon, Bicol, asin Western Visayas an naapektaran kan makusog na uran kawsa kan bagyo.
Sa kabilogan, 3,028 pamilya o 7,834 katawo an paramientras na nagtetenir sa 131 evacuation centers.
Sienerto man ni Dumlao na preparado pa an ahensya na magtao nin kadugangang tabang kun kinakaipuhan, huli sa may labi pang 2 milyong food packs na nakaimbak sa mga bodega kan DSWD sa bilog na nacion asin at P169 million na standby funds para sa mga operasyon sa pagresponde sa kalamidad.
