LEGAZPI CITY – Pinangenotan kan mga personahes kan Bureau of Fire Protection an ginibong flushing activity sa children’s playground kan Kalayaan Park sa Barangay Gogon, Legazpi City.
Segun ki BFP Legazpi Public Information Unit Chief Senior Fire Officer 2 Norman Andes sa intrevista kan Bombo Radyo Legazpi na ginibo an lakdang makalihis an bako magayon na parong sa nasambitang playground.
Tulos nindang isinagibo an operasyon makalihis makipagkoordinar an lokal na gobierno mantang nagdurar man suboot nin poco mas o menos kabangang oras an paglinig.
Nagin maray man an koordinasyon sainda kan LGU asin kan opisyales kan nasambitang truck sa enterong durasyon kan paglilinig.
Pigtaram pa kan opisyal na bukas pirmi asin preparado an saindang ofisina enkaso may maghagad nin tabang sa paglilinig kan saindang mga bisinidad.
Mawot man ninda na manteniron kan mga residentes asin nagpapasyar an kalinigan sa palibot kan Kalayaan Park asin itapok an mga basura sa tamang laganan.
Mientrastanto ipighayag man ni Andes na nangenot an saindang ofisina sa pagbabarewas nin tubig sa mga evacuation centers sa ciudad sa kasagsagan kan pag-agi ni Bagyong Ramil sa rehiyon kan Bikol.
