LEGAZPI CITY – Paramientras na pigsuspender kan mga otoridad an operasyon kan night market sa banwaan kan Daraga huli sa pig-antisiparang epekto ni Bagyong Ramil sa rehiyon Bicol.
Segun ki Daraga Public Market Administrator Themis Lobete sa intrevista kan Bombo Radyo legazpi na isinagibo an suspensyon para man sa kaligtasan kan mga partienda asin konsyumer huli sa makukusog na pag-uuran.
Amay na suboot sindang nag-anunsyar kan suspensyon nganing dae na mag-abala an mga paratienda na gikan pa sa kataraid na lugar asin provincia na magpasiring sa saindang banwaan nganing magtienda kan saindang mga produkto.
Basado sa saindang inisyal na datos an apektado an operasyon kan 317 na mga rehistradong paratienda sa saindang night market huli sa paramientras na suspensyon na kawsa kan Bagyong Ramil.
Sa ibong kaini an piglinaw kan opisyal na operational pa an mismong pampublikong merkado kan saindang banwaan alagad may mga nagkapirang establisyemento an napiritan nang magsarado nin amay.
Base man sa saindang obserbasyon an masasabi niyang diit sana an nagruso na mga parasaod sa mga pampublikong merkado kompara kan nangyari antes an pananalasa man ni bagyong Opong kan nakaaging bulan.
Afuera sa suspensyon an nagsagibo man sinda nin de-clogging operation sa palibot kan Daraga Public Market nganing malikayan an pag-apaw kan tubig sa mga drainage system mantang nagtao man sinda nin abiso sa mga paratienda na mag-preparar asin i-secure an saindang mga stalls.
Pagirumdom ni Lobete sa publiko na sa mga siring kaining may kalamidad an kaipuhan an permihang pag-iingat asin magdangog sa abiso kan mga otoridad.
