LEGAZPI CITY- Nagsurat na an gobierno provincial kan Albay sa manlain lain na ahensya ngani na maaraman kun nagsunod sa proseso asin kun legal an pagpapakudal sa pamitisan kan bulkang Mayon.
Ini makalihis na madiskubre kan team na nagi-inspeksyon sa illegal quarry an nasabing proyekto.
Segun ki Albay Governor Noel Rosal na pig-aaram na ninda sa Department of Environment and Natural Resources kun nag-isyu ini nin Environmental Compliance Certificate.
Marurumduman kaya na protected area an lugar asin laog ini sa permanent danger zone, kun sain ipinagbabawal an human activity.
Pig-aaram na man suboot sa registry of deeds kun igwang titulo an daga huli sa mga claims na nabakal an nasabing lote asin pigpapakudal kan tagsadiri.
Nagsurat na man sa nakakasakop na lokal na gobierno ngani na maaraman kun nagpaluwas ini in fencing permit.
Mientras tanto, sinabi ni Rosal na mantang nagpapadagos an imbestigasyon, ipinapundo na an patrabaho asin pinababa na an mga trabahador kan proyekto.
