LEGAZPI CITY – Karsel an bagsak kan pigkokonsiderang rank 4 regional most wanted person kan Bicol huli sa manlain-laing kaso sa Navotas Fishport Complex, Navotas City.
Segun ki Albay Police Provincial Office Provincial Director Police Colonel Noel Nuñez sa intrevista kan Bombo Radyo Legazpi na binisto an suspetsado na si alyas “Kiel” na nahahampang sa mga kasong Qualified Sexual Assault, five counts kan Statutory Acts of Lasciviousness, asin Qualified Rape of a Minor.
Nagibo suboot kan suspetsado an saiyang pagkakasala sa ciudad kan Tabaco asin nagporbar na magtago sa Navotas nin haros sarong taon.
Naisakatupadan man an pagkakadakop sa suspek huli sa pakikipagtabangan kan saindang ofisina asin Tabaco City Police Station sa Northern National Capital Region Maritime Police Station, Baseco Maritime Law Enforcement Team, asin Northern District Intelligence Team–Regional Intelligence Unit NCR.
Nagpapasalamat man an opisyal sa magayon na pakikipagtabangan kan publiko nganing madakop an mga indibidwal na may mga kaso asin haloy nang nagtatago sa mga ley nganing matawan nin hustisya an saindang mga biktima.
Promesa man ni Nuñez na papahiguton pa ninda an saindang mga operasyon nganing mamantenir an pazy orden sa provincia kan Albay.
