LEGAZPI CITY – Nakumpiska kan mga otoridad an pirang mga pampasabog na piggagamit sa ilegal na pagsisira sa kadagatang sakop kan Rapu-Rapu, Albay.
Segun ki Rapu-Rapu Municipal Police Station Chief of Police Police Major Joseph Melitante sa intrevista kan Bombo Radyo Legazpi na nadiskubre ninda an nasambitang mga kagamitan sa isinagibo nindang sea-borne patrol katabang an Philippine Coast Guard asin mga barangay officials kan Barangay Mancao.
Sa nasambitang operasyon suboot an tuminakas an mga kaduda-dudang parasisira makalihis na marisa an saindang presensya asin binayaan an duwang de-motor na bangka.
Sa isinagibong inspeksyon, nadiskubre an sarong improvised explosive device na may ammonium nitrate o pig-aapod na “bagas-bagas” asin iba pang kagamitan para sa iligal na pagsisira.
Pigtaram pa kan opisyal na igwa na sindang impormasyon mapadapit sa identidad kan mga suspetsado huli man sa pakikipagtabangan kan mga residentes na nagsisira man sa nasambitang kadagatan.
Padagos man an saindang eksaminasyon sa mga narekober na mga pampasabog kun sain idinara na ini Police Regional Office 5 mantang sa Bureau of Fisheries and Aquatic Resources (BFAR) man dadarahon an mga sira na nakumpiska na resulta kan pagpapasabog.
Nakatalaan mang sinda magkondusir nin hot-pursuit operation laban sa mga suspetsado nganing matawan man nin hustisya an kapalibutan.
Pangapodan ni Melitante sa suspetsado na magsuko na sana sa saindang ofisina huli ta mahahanap man sana siya kan mga kapulisan.
