Nangapodan si Health Secretary Ted Herbosa sa satuyang mga kababayan na dae paglingawan an mental health kan mga Pilipinong labing naapektaran kan mga sakuna asin kalamidad na satuyang na-eksperyensyahan.
Kasabay kaini, pinahigot pa kan Department of Health (DOH) an pagpapa-otob kan manlain-laing lakdang na obhetong matabangan an mga kababayan nyatong nasalanta kan linog asin iba pang trahedya.
Basado sa datos kan ahensya, uminabot na sa 1,522 na indibidwal hale sa manlain-laing parte kan Cebu an nakatanggap nin Mental Health and Psychosocial Support (MHPSS), pati na man an iba pang magkakanigong intervention.
Dagdag pa digdi, naghanda na man an DOH nin sarong komprehensibong plano para sa pagtatao nin psychological first aid sa Davao Region asin sa mga kataraid na lugar na niyugo man kan linog kan Biyernes.
Segun kay Secretary Herbosa, an mga nasambitang aksyon an nasususog sa direktiba ni Presidente Ferdinand Marcos Jr. na syertuhong dae mapapabayaan an kapakanan kan mga namamanwaang naka-eksperyemsya nin takot, matinding pagkahandal, o anxiety.
Pigsyerto kan gobierno na matatawan sinda nin kalinga, magin sinda man an paramientras na nagtetenir sa mga tent city o nakabalik na sa saindang mga harong.
