Ina-activate na kan Coast Guard District Southeastern Mindanao an saindang deployable Response Group team kasunod kan tuminamang makusog na linog sa Manay, Davao Oriental ngonian na Biyernes, Oktubre 10.
Obheto kaini na masyerto an marikas na pagresponde sa mga apektado kan makusog na pagyugo siring man nganing tumabang sa pagsasagibo nin damage assessment, asin search and rescue operations.
Katakod kaini pigsugo kan Coast Guard District an gabos na mga istasyon asin sub-stations kaini partkular na an nasa Davao Oriental na makipag-koordinar sa saindang Disaster Risk Reduction and Management Councils asin syertuhong handa sa posibleng deployment an saindang response teams.
Inilaag na man sa heightened alert status an gabos na Coast Guard personnel asin assets sa lugar nganing masyerto an marikas na aksiyon asin suporta sa mga lokal na gobierno.
Mientrastanto, nag-isyu na man an Coast Guard District nin Sea Travel Advisory na nagsususpendi sa biyahe sa dagat kan gabos na barko asin iba pang behikulong pandagat sa lugar huli sa huma kan tsunami asin halaton an iluluwas na panibagong abiso kun ligtas na an pagbiyahe sa dagat.
