LEGAZPI CITY – Nanindugan an dating alkalde kan Tabaco City na bako ghost project an ipigtutugdok na P52 million multi purpose building na suboot pigkokonektar ki Senator Risa Hontiveros.
Segun ki Albay 1st District Representative Krisel Lagman sa intrevista kan Bombo Radyo Legazpi na fake news an nasabing akusasyon huli ta an nasabing proyekto an multi-year project na aprubado kan Regional Development Council.
Punto niya na an first phase an napondohan nin P12 Million sa irarom kan 2023 General Appropriations Act mantang zero budget suboot ini kan taong 2024 huli ta may mga proyektong dapat enuton.
Dagdag pa niya na bago matapos an 2024 an digdi na siya nagpatabang ki Senator Hontiveros na kun pwedesir madugangan an budget para sa completion o second phase kan nasambitang proyekto.
Pigtaram pa kan opisyal na ngonian sana nagin imbwelto an nasambitang senador sa proyekto huli ta an budget para sa second phase an kan nakaaging Agosto pa sana na-bid asin ipigpadagos an konstruksyon kan nakaaging bulan nin Setyembre.
Ipigdoon niya na dakol kaya an mas nangangaipuhan sa ciudad kan Tabaco kun kaya iyo na muna an pig-enot mantang ipigbugtak na niya sa 2026 budget an completion kan covered court asin nagmamawot siya na dae ini matanggal nganing dagos na ining matapos.
Kompyansa man siya na maibubusol an pondo kan proyekto para sa completion huli ta kabale ini sa pigkokonsidera nindang allocable kun sain sinda an may kaaraman sa mga nangyayari sa saindang distrito.
Nagtutubod si Representative Lagman na mga kaalyado ni Former Congressman Zaldy Co an nasa likod kan pagpapalakop nin mga alegasyon huli ta haloy na niyang ipigbubuyagyag an mga anomalya kan mga proyekto ninda Co sa Bacacay asin Sto. Domingo kun kaya nagbalos an mga ini saiya asin ki Sen. Hontiveros.
