LEGAZPI CITY—Preparado na an mga kapulisan kan provincia kan Catanduanes mapadapit sa posibleng huma kan bagyong Paolo sa nasabing lugar.
Segun ki Catanduanes Police Provincial Office Public Information Officer Police Lieutenant Colonel Rosalinda Gaston, sa intrevista kan Bombo Radyo Legazpi, naka-standby na an saindang mga personahes sa manlaen-laeng hepatura kan kapulisan.
Siring man na nakikipagkoordinar na sinda sa mga local disaster risk agencies para sa preparasyon sa bagyo.
Nagkundusir na man suboot an saindang kapulisan sa pag-check kan mga kadagatan magin sa flash flood asin landslide-prone areas sa provincia.
Nagpatanid man an saindang kapulisan sa mga residentes na mag-ingat, magin preparado, asin mag-antabay sa mga local disaster risk management offices asin kapulisan mapadapit sa sitwasyon kan saindang lugar nganing maibitaran an ano man posibleng huma sa sainda kan raot nin panahon.
Dugang ni Gaston na sa presente wara pa man na ipig-ebakwar na mga residentes alagad preparado man an saindang kapulisan magtaong asistensya sa lokal na gobierno en kaso magpaotob nin pag-ebakwar.
Mientrastanto, mensahe kan opisyal na en kaso may mamatean na pag-uuran urog na an harani sa flash flood asin landslide-prone areas na magin preparado asin dae muna magpasiring sa lawod partikularmente ngunyan na may raot nin panahon nganing maibitaran an ano man na dae piglalaomang insidente.
Siring man na magdangog sa mga bareta mapadapit sa kamugtakan kan panahon asin pag-apod sa 911 en kaso may emerhensya sa saindang lugar.
