LEGAZPI CITY—Nangapudan an Municipal Disaster Risk Reduction and Management Office Pio Duran sa mga manlaen-laeng ahensya kan gobierno mapadapit sa pagresolbar sa pagbiyahe kan mga ihahatod na tabang sa provincia kan Masbate na labing rinapado kan bagyong Opong.
Segun ki MDRRMO Pio Duran Head Noel Ordoña, sa intrevista kan Bombo Radyo Legazpi, naki-olay sainda an Office of Civil Defense na matabangan sinda sa Pio Duran port na matawan prayoridad an pagbyahe kan mga relief goods na hale sa Office of the President.
Alagad segun saiya na wara suboot sindang poder huli ta sinda sarong local government unit (LGU) asin an may poder suboot sa pagdesisyon an Philippine Ports Authority (PPA).
Kan saindang naka-olay an PPA asin Philippine Coast Guard, sinabi kan duwang ahensya na wara sindang poder na nagresulta sa pagkakaralibungan kan mga naunambitang oficina.
Pigsuhestyon ni Ordoña na ka-ulayon an Maritime Industry Authority (MARINA) asin Department of Transportation (DOTr) huli sa an nasusunod sa Pio Duran bako man an PPA asin Coast Guard kundi an mga shipping lines.
Segun saiya na dakol an stranded na pasahero sa Pio Duran na pasiring sa Cebu, kun saen dae sinda pwedesir na maglunad sa ibang barko afuera sana sa Kho Shipping Line. Alagad kun dae sinda maglunad sa nasabing shipping line pasiring sa Masbate, an dae man sinda i-aakomodar.
Pagdoon kan opisyal na dapat maggibo nin interbensyon an MARINA asin DOTr huli sa sinda an may kontrol sa shipping lines.
Nangangapudan si Ordoña sa Office of Civil Defense, Regional Disaster Risk Reduction and Management Office asin iba pa na mag-orolay mapadapit sa saindang agrangay nganing dae man suboot mapagalan an lokal na gobierno kan Pio Duran sa pag-akomodar sa mga byahero sa saindang pantalan.
