LEGAZPI CITY- Aktibo ngunyan an pigigibong pagtatrabaho kan mga linemen kan First Catanduanes Electric Cooperative ngani na maibalik na an suplay kan kuryente sa Masbate.
Segun ki First Catanduanes Electric Cooperative General Manager Engr. Francis Gianan sa intrevista kan Bombo Radyo Legazpi na nagkapirang aldaw antes an pagtama kan bagyo, naihanda na an saindang mga personahe asin mga ekipahe.
Katunayan, in-activate na an emergency response team ngani na marikas na makapagpasiring sa mga lugar na tinamaan kan raot nin panahon.
Napag-araman na pighihiling man ini bilang paagi kan pagbalos sa tabang na naresibe kan Catanduanes kan minsan man sindang tamaan nin makusog na bagyo.
Marurumduman na sa irarom kan ‘Task Force Kapatid’ aktibong nagtatarabangan an mga electric cooperatives sa manlain lain na mga lugar enkasong igwang nag-aaging raot nin panahon.
Basado sa enot na mga report, napag-araman na matinding nadistroso an mga electric facilities sa Masbate.
Segun ki Gianan na igwa pang problema sa substation kan power supplier na saro sa mga pigtatawan nin atesyon sa ngunyan.
