LEGAZPI CITY – Nakatalaan mang maghatod nin tabang asistensya an Ako Bicol partylist para sa mga bicolanong nadanyaran kan pangrarapado kan Bagyong Opong partikulamente na an provincia kan Masbate.
Segun ki Ako Bicol Partylist Representative Alfredo Garbin sa intrevista kan Bombo Radyo Legazpi na kabale sa team na ipinadara an mga voluunters, staff, asin mga pangenot na kaipuhanon ngonian kan mga Masbateño arug kan bagas asin iba pang klase nin pagkaon.
Target nindang maibarewas na ngonian na aldaw an tabang sa oras kan pag-abot kan saindang team sa haros 10,000 na pamilya makalihis na matawan nin permiso kan mga otoridad na maglawod pasiring sa naunambitang provincia.
Ipinadara man ninda an saindang food truck nganing may magpreparar man nin makakaon sa mga residentes mantang pigsasagibo an relief operation.
Pigtaram pa kan opisyal na afuera sa relief operation an mawot man nindang magkondusir nin medical mission sa mga masunod na aldaw nganing makapag-ofresir man sinda nin tabang medikal para sa mga apektadong residentes.
Pagsyerto pa ni Rep. Garbin na gigibuhon ninda an gabos nganing makapaghatod nin tabang urog nang digdi namidbid an saindang partylist na nagtatabang sa mga naapektaran kan manlain-laing klase nin kalamidad.
