LEGAZPI CITY – Napaghandaan kan mga residentes asin opisyales kan Barangay Gogon, Legazpi City an pag-agi sa rehiyon Bicol ni Bagyong Opong.
Segun ki Punong Barangay Ma. Theresa Naz sa intrevista kan Bombo Radyo Legazpi na nakapagsagibo sinda nin evacuation partikulamente an mga naka-istar sa low lying areas antes manalasa sa rehiyon kan naunambitang bagyo.
Uminabot man sa labi 60 pamilya an nagtenir sa evacuation center asin an iba man an nagtenir sa mga harong na may matibay na pundasyon sa kasagsagan kan pangrarapado ni Opong.
Sa presente an nakabalik na suboot sa kaniya-kaniya nindang harong an mga residentes susog na man sa direktiba kan gobierno lokal mantang nakatalaan sindang magbarewas nin relief goods na itatao man kan City Social Welfare and Development Office.
Pigtaram pa kan opisyal na basado man sa saindang monitoring an wara man na nairehistrong nadanyaran na harong asin ikina-ugma ninda na dae sinda naka-eksperyensya nin pagbabaha.
Nagpasalamat man si Naz sa saiyang nasasakupan huli sa ipinahiling na koordinasyon mapadapit sa preparasyon kan pag-agi sa rehiyon Bicol ni Bagyong Opong siring man sa saindang tanod asin Barangay Health workers sa pagbabantay kan sitwasyon.
