LEGAZPI CITY-Posibleng mag-landfall nin atab saaga an Severe Tropical Storm “Opong” sa Northern Samar asin sa Sorsogon.
Segun kay Weather Specialist Christian Alen Torevillas, sa intrevista kan Bombo Radyo Legazpi, na laoman na enot na malandfall an bagyong Opong sa Northern Samar asin an ikaduwang landfall kaini sa Bicol Region sa Sorsogon.
Huring nahiling an bagyong Opong sa rayong 195 km East Northeast kan Guiuan, Eastern Samar o 225 km East kan Borongan City kun sain naghihiro ini sa Westward sa rikas na 15 km/h asin may kusog ki paros na nasa 110 km/h asin pagbugso na nasa 135 km/h.
Nakataas man an signal no. 3 sa Sorsogon, northern portion kan Masbate kairiba na an Ticao asin Burias Island.
Mantang signal no. 2 man sa Albay, Camarines Norte, Camarines Sur, Catanduanes, asin natatadang parte kan Masbate.
Laoman man an makukusog na paguuran sa mga masunod na oras asin aldaw kun sain posibleng magabot sa labi 200mm an uran sa rehiyon kan Bicol.
Pinagiingat man suboot an gabos huli sa banta kan posibleng mahiwasang pagbabaha asin landsalide orog na sa mga high risk areas.
Posible man suboot na magbago pa an track kan bagyo asin an landfall area kaini huli sa probability na pagtaas asin pagbaba kan bagyo.
Makakaeksperyensya man nin makukusog na paros an nasa Signal no. 3 asin Signal no. 2.
Pagirumdom sa mga kababayan na padagos na magantabay sa mga impormayson na ipinapaluwas kan mga ahesnya sa social media asin magsunot sa anunsyo kan mga opisyal asin otoridad.
