LEGAZPI CITY – Arestado an sarong persona makalihis na makuwaan nin ipinagbabawal na droga sa Sitio Puna, Barangay Villa Inocencio, Placer, Masbate huli sa bisa kan search warrant.
Segun ki Placer Municipal Police Station Officer-in-charge Police Major Michael Albania sa intrevista kan Bombo Radyo Legazpi na binisto an suspetsado na si alyas “Eton Amay”, 60 anyos , lalaki, warang trabaho asin residente kan kaparehong lugar.
Nakuwa sa pagsasadiri kan suspetsado an pitong heat sealed transparent plastic sachet na naglalaman nin pigtutubudang shabu na may kabilugang gabat na poco mas o menos 1.3 gramos na pigkakarkulong maabot sa poco mas o menos P8,800.
Naisakatupadan suboot an operasyon huli sa pakikipagtabangan kan Regional Police Drug Enforcement Unit 5 (RPDEU5), Provincial Police Drug Enforcement Unit (PIU/PPDEU) kan Masbate Police Provincial Office asin sa Philippine Drug Enforcement Agency Regional Office 5.
Pigtaram pa kan opisyal na padagos an saindang kampanya laban sa ilegal na droga nganing mapugo na an paglakop kaini sa saindang lugar.
Mahahampang man suboot an suspetsado sa pagbayolar sa Republic Act 9165 o an Comprehensive Dangerous Drugs Act of 2002 mantang may ipigbugtak man na pyansa para sa saiyang temporamenteng libertad.
Sa presente an nagtetenir an naarestar na suspetsado asin mga narekober na ebidensya sa kustodiya kan Placer MPS para sa magkakanigong disposisyon mantang nagpapadagos an kadugangang imbestigasyon.
Pagsyerto ni Albania sa publiko na dae magduwang isip na magdulok sainda patungkol sa mga indibidwal na imbwelto sa ilegal na droga nganing matawan ini nin magkakanigong aksyon asin mamantenir an pazy orden sa mga komunidad.
