LEGAZPI CITY – Nakisumaro an mga paratukdo asin mga estudyante sa isinagibong black friday protest kan nakaaging aldaw nganing ipahiling an saindang pagkondena sa nangyaring korapsyon sa mga flood control projects kan Gobierno.
Segun ki University of the Philippines College of Mass Media and Communication Professor Danilo Arao sa intrevista kan Bombo Radyo Legazpi na magayon hilingon na nagbabalik an diwa nin aktibismo sa mga unibersidad mantang nakatalaan na magsagibo liwat nin paghiro sa maabot na Setyembre 21 kun sain isasabay ini sa anibersaryo kan deklarasyon kan Martial Law.
Obheto suboot kan mga nangyayaring paghiro sa nacion an nganing maipahiling an mismong problema sa sistema asin gobierno huli ta kun iisipon, bako na bago an mga nangyayaring panghahabon sa mga buwis na pigbabayad kan publiko.
Halata man an dagit kan mga estudyanteng nakisumaro sa protesta huli sa mga nangyaring pangbabarat sa mga pondo partikular na sa sektor kan edukasyon na nahihiling sa kamugtakan kan mga unibersidad sa presenteng panahon.
Pigtaram pa kan naunambitang paratukdo na kadakol ngonian na proyekto na itutugdok kuta sa University of the Philippines alagad dae na naipadagos kun kaya nagtetenir na biktima an mga eskwelahan asin unibersidad sa mga katiwalian sa gobierno.
Piglinaw niya man na may mga nakatugdok man na mga bagong edipisyo alagad dae man napapakinabangan tuyong nag-uuran huli ta daog pa suboot an mga waterfalls sa kadakol na nagtatagdo na epekto man kan substandard materials.
Epektibo man an mga protesta arug kan black friday protest nganing maipahiling sa gobierno na bako silensyo asin namamatean kan mga estudyante an epekto kan katiwalian asin dapat manimbag an gabos na imbweltong opisyal bako sana an mga Discaya asin iba pang contractors.
Sa kabilugan, masasabi ni Arao na ini na an pinakadakulang hiro protestang nangyari sa unibersidad poon kan panahon kan Covid 19 Pandemic na nagpapahiling kan pagkakasararo kan taumbayan laban sa katiwalian kan mga pulitiko asin mayayaman.
