LEGAZPI CITY – Padagos an namamateang maraot na panahon asin pabugo-bugsong uran sa provincia kan Sorsogon sa nakalihis na magdamlag.
Segun ki Sorsogon Provincial Disaster Risk Reduction and Management Office head Engineer Raden Dimaano sa intrevista kan Bombo Radyo Legazpi na padagos nindang pagbabantay poon pa kasubanggi partikular na sa magigin epekto kan Low pressure Area sa saindang provincia.
Maski suboot dae pa nagpapaluwas nin weather advisory an state weather bureau an nakikipagkoordinar na sinda sa gabos na mga Disaster Risk Reduction and Management Office asin mga barangay partikular na an mga nasa coastal areas.
Sa ibong kaini an wara man sindang ipinaluwas na suspensyon kan klase asin trabaho sa ofosina kan gobierno alagad nagpagirumdom sinda na magtenir na rigmat sa mga posibleng mangyari sa mga masunod na oras.
Pigtaram pa kan opisyal na nakabandera na an saindang blue alert status asin nakahanda na an saindang mga personahes para sa posibleng deployment urog na kun maglala pa an mga namamateang pag-uuran.
Pigbabantayan na man ninda an mga darakulang salog sa provincia nganing tulos na maihatod sa publiko an presenteng status kan lebel kan tubig asin tulos na makagibo nin magkakanigong lakdang enkaso mag-apaw an mga ini.
Naglalaom si Dimaano na dae na maglala an mga pag-uuran asin maggayon na an kamugtakan kan panahon alagad kun enkaso maglala talaga an tulos sinda magsasagibo nin evacuation partikular na sa mga apektadong lugar.
