Nilipat kan Sandiganbayan Special Third Division an nakatalaan kutang promulgation kan hatol para sa 15 kasong graft laban ki dating Senate President Juan Ponce Enrile, saiyang dating chief-of-staff na si Jessica “Gigi” Reyes, negosyanteng si Janet Lim-Napoles, asin iba pa katakod kan salang paggamit kan P172 million PDAF o pork barrel funds.
Segun ki Atty. Dennis Pulma, clerk of court kan Sandiganbayan Third Division, itinakda an bagong petsa kan promulgation sa Oktubre 24, 2025.
May “reflection” suboot na isinunad an saro sa mga mahistrado kan Special Division, kaya kinakaipuhang i-octaba muna an pagbaba kan desisyon nganing tawan nin dalan an mahigot na deliberasyon.
Nag-atendir online sa promulgation sinda Enrile, asin Napoles mantang personal na nag-atendir si Reyes asin iba pang akusado.
Magigiromdomang inihayag ni Reyes kan Nobyembre 2023 na dae siya kinonsulta sa pinirmahang surat ni Enrile sa Commission on Audit (COA) kan 2012, kun saen kinumpirmar kaini an mga pirma kan saiyang mga staff na ginamit sa mga endorsement letters kan mga NGO na pigmamanehar kaito ni Napoles.
Mientrastanto, inihampang kan prosekusyon an mga ebidensya siring kan surat ni Enrile kan 2008 ki dating Budget Secretary Rolando Andaya Jr., kun saen pighahagad niya an pagluwas kan saiyang PDAF para sa mga proyektong ipinaotob kan mga NGO na konektado kay Napoles.
Nagpatotoo man an mga opisyal kan Department of Budget and Management asin COA, siring man an pirang municipal agriculturists gikan sa mga provincia na dapat kutang nakaresibe kan mga agricultural packages asin livelihood projects.
Segun sainda, dae ninda natanggap an mga benepisyong nakabugtak sa mga dokumentong katakod sa PDAF ni Enrile.
