LEGAZPI CITY—Arestado kan mga otoridad an rank number 4 most wanted person kan rehiyon nin Bicol sa Purok 3, Sitio Bliss, Barangay Cabraran, Jovellar, Albay.
Segun ki Jovellar Municipal Police Station Chief of Police Police Captain Rufino Casagan, sa intrevista kan Bombo Radyo Legazpi, naarestar an suspek huli sa ipinaluwas na mandamiento de aresto kan Presiding Judge of Family Court, Branch 2, Daraga, Albay na may petsang Agosto 28, 2025 sa kasong two counts of statutory rape na warang pigrekomendang piyansa.
Naarestar an suspek sa pinagsarong operatiba kan Jovellar MPS, Criminal Investigation and Detection Group (CIDG) Albay Provincial Field Unit, Albay Provincial Intelligence Team asin Regional Intelligence Unit 5.
Sa presente, an suspek nasa kustodiya na kan CIDG 5 para sa magkakanigong disposisyon.
Mientrastanto, abiso man kan opisyal sa namamanwaan kan Jovellar na pwedesir mag-dial sa 911 hotline en kaso kinakaipuhan nin pagresponde kan saindang mga kapulisan.
