Nauli sa karaw an sarong parte kan pagdangog mapadapit sa flood control projects.
Sa tahaw ini kan mainit na pagdangog kan Senate Blue Ribbon Committee, suminingit sa seryosong orolay kan haputon ni Senador Jinggoy Estrada an kontratistang si Curlee Discaya kun may mga senador bang imbwelto sa kontrobersyal na isyu.
Tulos na sinimbag ni Discaya na “Wala po.”
Digdi na kinarawan ni Committee Chairman Rodante Marcoleta si Estrada nin, “Safe ka na.”
Sa ibong kan may halong karaw, tulos na naghagad si Estrada na tanggalon sa opisyal na record an nasabing pahayag, bilang paggrespeto sa pormality kan pagdangog.
Enot digdi, an mag-agom na Curlee asin Sarah Discaya na parehong contractor, na imbwelto sa ginatos na proyekto kan gobyerno, an naghampang sa Senado nganing isiwalat an suboot mahiwasang korapsyon sa DPWH asin Kamara.
Segun sainda, napiritan sindang makibali sa mga anomalous bidding asin magtao nin kickback sa pirang opisyal kapalit kan proyekto.
Sa saindang testimonya, pinangaranan ninda an pirang mambabatas asin DPWH personnel na suboot naghahagad nin 10% sagkod 25% na komisyon hale sa kantidad kan proyekto.
Saro suboot sa mga kalimitang banggiton sa mga transaksyon iyo an si Rep. Elizaldy Co, mantang pirang pangaran kan mga mambabatas an idinawit sa suboot “menu-style” na ofresir kan proyekto.
An pahayag ni Curlee Discaya na warang senador an imbwelto an sarong importanteng paglilinaw sa tahaw kan mga nagluluwas na pangaran sa Kamara.
