LEGAZPI CITY – Nagpatanid an kapulisan sa publiko asin kagsadiri nin mga behikulo na dae basta-basta magtubod sa mga indibidwal na nagrarani sainda asin nagtataram na may problema an saindang behikulo.
Ini an makalihis mabiktima an sarong persona sa sarong barangay sa ciudad kan Legazpi na nagviral sa social media an ginibong pananalisi kun sain nagsagin-sagin an suspetsado na nahulog suboot an plate number kan behikulo kan biktima alagad kan pagluwas an may saro man na naghahalat asin pighabon an gamit na nasa laog kan kotse.
Segun ki Legazpi City Police Station Public Information Officer Police Executive Master Sergeant Carlos Paña sa intrevista kan Bombo Radyo Legazpi na maski dae na nagsunad nin kaso an biktima, mawot nindang ma-impormar an publiko sa bagong modus operandi ngonian kan mga suspetsado an pig-aapod nindang “salisi”.
Pwedesir suboot na dae nagin matrayumpo an mga ini sa pambubudol asin naglipat sa bago nindang paagi nganing makapag-habon kun sain pig-eenganyar ninda an driver na magbaba sa saindang behikulo asin an kasabwat niya man an mahiro nganing habunon an mga gamit urog na kun solo an driver.
Suhestyon niya man na kun dae talaga malilikayan na magbaba sa mga behikulo an syertuhon na sanang naka lock an mga pinto bago magluwas nganing maibitaran an paglaog kan sisay man na persona na dae mo namamalayan.
Pigtaram pa kan opisyal na naglilibot an mga suspetsado sa ciudad nganing hilingon kun siisay an saindang pwedeng mabiktima mantang naglalaog man ini sa mga mall na kompwesto nin sagkod anom katawo na nambibiktima nin may edad na.
Sa presente, pig-aaram ninda kun may nakasunad na warrant of arrest laban sa miyembro kan nasabing grupo nganing tulos ining ma-arestar asin dae na makapang-biktima nin iba pa.
Pangapodan man ni Paña sa mga mabibiktima kan salisi modus na maski diit o dakol an nahabon sainda, dae magduwang-isip na magsumbong sa kapulisan nganing matawan nin magkakanigong aksyon nganing masampolan an mga ini sa saindang salang gawi.
