LEGAZPI CITY – Nangapodan an nagkapirang mga residente kan Barangay Oro Site, Legazpi City sa kataraid na barangay na maging disiplinado sa pagtapok nin basura makalihis an isinagibong clearing operation na ginibo kan City Government sa sarong kanal na sakop kan saindang lugar.
Paliwanag kaya ni Veronica Cielo, residente kan naunambitang barangay sa intrevista kan Bombo Radyo Legazpi na permihan man na piglilinigan duwang beses sa sarong bulan an nasabing kanal.
Alagad pagladawan niya na sinda suboot an nagigin tambakan kan mga basura na ipigtatapok man kan ibang residente sa kataraid nindang barangay kun kaya sinda an naaapektaran sa epekto kaini urog na kun nag-uuran.
Ipigpapasalamat man ninda na maski natatambak an mga basura an wara nin nagkakaigwa nin helang sa saindang mga kapwa residente partikular na an mga kaakian.
Pigtaram pa kan nasabing residente na pigpaplanuhan man kan Gobierno Lokal na magbugtak nin prototype floating trash net sa mga boundaries kan kada barangay na naaagihan kan nasabing salog nganing dae na pag-anudon an saindang mga basura pasiring sa ibang barangay.
Punto niya man na sa kaharongan pa sana dapat an nagpopoon na an segregation kan basura urog nang pigpapa-otob na sa manlain-laing barangay an no segregation no collection policy.
Mensahe ni Cielo sa ibang barangay na punduhan na an pagtapok sa naunambitang salog huli ta an saindang barangay an nagsasapar asin nadadanyaran kan epekto kan pagkatambak kaini urog na kun makusog an pag-uuran sa ciudad.
