LEGAZPI CITY – Nangapodan an mga paratukdo kan Mary Perpetua E. Brioso National High School kan Brgy. Magsalangi, Milagros, Masbate sa mga opisyal kan gobierno na pagibuhan nin tulay an saindang agihan pasiring sa eskwelahan.
Segun ki School Head Arnel Ocsing Alba sa intrevista kan Bombo Radyo Legazpi na haros sinda gabos na mga paratukdo sa eskwelahan an pahirapan an pagbalyo sa salog asin lalo ining nagigin difisil urog na kun nagbabaha na epekto kan mga pag-uuran.
Imbes suboot na makauli sana sinda sa kaniya-kaniyang harong an kinakaipuhan pa nindang magpabuhat sa mga residente mantang sakay sinda kan saindang mga motorsiklo nganing makabalyo.
Paghistorya niya pa pwedesir mang mag-agi sa dagat nganing makabalyo sana alagad pigpoproblema man ninda an makukusog na ukol kan alon kun kaya wara sindang pagpipilian kundi an mag-agi sa pigbabaha na agihan.
Pigtaram pa kan naunambitang School Head na nagpapangadyi na sana siya sa kada pigbubuwat sinda kan mga residente huli sa posibleng matalisod an mga ini na posibleng magkawsa nin aksidente.
Mawot nindang madadangog sinda kan gobierno na patugdukan nin tulay huli ta kadaklan kan mga island teachers asin ibang estudyante an nagbabalyo sa agihan na maski maluya sanang pag-uuran an permihang pigbabaha.
Enkasong dae na talagang kaya magbalyo huli sa labing pagbabaha an napipiritan sindang mag-implementar nin modular distance learning.
Pagdoon ni Alba na dakulang benipisyo para sainda kun mapapagibuhan nin halangkaw na tulay huli ta bako sana sinda an makikinabang kundi pati na man an mga estudyante na naapektaran sa pagkakansela nin klase enkaso maghalangkaw an tubig baha.
