Nagsagibo nin information caravan an Fertilizer and Pesticide Authority (FPA) Region V manungod sa tama asin salbadong paggamit kan mga paraooma nin mga pataba asin abono sa saindang mga pananom pati man an paggamit kan agricultural drone.
Segun ki FPA Bicol Regional Officer Gabriel Atole sa intrevista kan Bombo Radyo Legazpi na obheto kan aktibidad na ma-impormaran an mga paraooma na pwedesir nindang aprobitsaran an drone service application na gagamiton para sa rice seedling asin pag-aabono.
Nagkondusir na man sinda nin kaparehong caravan sa manlain-laing parte kan provincia nganing tukduan nin ligtas asin tamang paggamit nin mga abono asin pesticide, asin ipabisto an drone application bilang makabagong teknolohiya sa pag-ooma.
Kabale sa natukduan asin naimpormaran ninda iyo an mga kooperatiba, mga clusters farmer association, irrigators association asin mga agrarian reform beneficiaries.
Pigtaram pa kan opisyal na sa paagi kan nasabing drone, kayang magspray nin pesticide asin abono sa sarong ektaryang omahan sa laog sana nin 15 minutes na makakatabang nganing mapadali an trabaho kan mga paraooma urog na an mga may edad na alagad dapat nasa minimum nin 20 hectares kada cluster nganing dae man masayang an pagpapalupad kan drone.
Pwedesir man suboot magpalista an mga kabale sa rice cluster areas sa saindang mga Municipal Agriculture Office nganing ma-aprobitsaran an drone service asin kaipuhan sanang mag-signify na willing sinda mapadapit sa nasabing application.
Sa presente an padagos an saindang monitoring nganing mapa-otob an mga regulasyon asin polisiya sa pag-spray kan mga abono asin pesticide urog nang delikado ini para sa salud kan sarong tawo.
Nagpagirumdom man si Atole sa paraooma na kun mabakal nin pesticide asin abono na duman mag bakal sa mga lisensyadong tiendahan kan Food and Drug Administration, magbakal sana nin rehistradong pataba asin ibitaran an pagbakal online.
 Region V conducted an information caravan on the proper and safe use of fertilizers and fertilizers by farmers in their crops as well as the use of agricultural drones.){kind=link}