LEGAZPI CITY-Mas pinakusog ni President Ferdinand Marcos Jr. asin South Korean President Lee Jae Myung an strategic partnership kan duwang nacion makalihis an pag-oolay kan duwang nasambitang lider sa paagi kan telepono kan Agosto 14, 2025.
Tinawan doon ni President Marcos an importansya kan suporta hale sa mga partner coountries sa pagmamantenir kan maritime interest kan Pilipinas asin stability sa mga rehiyon.
Segun sa Presidente, nagin produktibo an saindang pagoolay asin natalakay ninda kan South Korean President an pagpapahiwas kan koordinasyon kan duwang nacion, partikular sa trade at investment asin sa kooperasyon sa pagsasangat pa kan mga development initiatives na magbi-benepisyo sa mga namamanwaan kan Pilipinas asin South Korea.
Napagolayan man suboot an kooperasyon sa linya kan imprastruktura asin people to people exchanges, kung sain tinawan doon an Strategic Partnership kan duwang nacion bilang sarong oportunidad para sa pagpapararom kan koordinasyon kaini.
Pinasalamatan man ni President Marcos an South Korea sa saindang pagtabang asin suporta sa Pilipinas.
Mientrastanto, sa kampo ni Lee, pigsierto kaini an suporta para sa sarong makusog na Association of Southeast Asian Nations (ASEAN).
Sa presente, puspusan man an paghahanda kan Pilipinas para sa ASEAN chairmanship sa taong 2026.
