LEGAZPI CITY – Nanindugan an Municipal Government kan Guinobatan na nagkatarapos na an kadaklan sa mga ipigpatugdok na mga flood control projects sa banwaan.
Segun ki Mayor Ann Gemma Ongjoco sa intrevista kan Bombo Radyo Legazpi na wara sindang na-monitor na may ongoing construction pa sa mga nasabing project sa saindang lugar.
Nagsusumite man suboot sainda an Department of Public Works and Highways enkasong may pigsasagibong mga projects sa saindang banwaan asin kun sain hale an pondo.
Pagdoon niya man na parte kan saindang trabaho an monitoring sa mga barangay kan pigtugdukan nganing aramon an kamugtakan kan residentes asin nganing aramon kun ano pa an saindang suhestyon nganing tulos na maidulok sa DPWH.
Pigtaram pa kan opisyal na naghahagad sana sainda nin tabang an DPWH nganing kaolayon may mga kagsadiri kan omahan o property na matatamaan kan construction kan mga flood control projects.
Kun siya suboot an hahaputon, masasabi niyang epektibo an gabos na ipinatugdok na flood control projects sa saindang banwaan partikular na kan rapaduhon an rehiyon Bicol kan Super Typhoon Rolly kan 2020.
Paninindugan niya man na dapat nagmomonitor an mga Local Government Unit sa mga proposal kan mga project asin dapat sanayon na mag-courtesy sainda an DPWH asin contractor nganing maaraman kun saing parte kan saindang sakop an pagtutugdukan nin mga flood control projects .
Pabor man si Mayor Ongjoco sa ipigsasagibong imbestigasyon ni President Ferdinand Marcos Jr. manungod sa suboot katiwalian sa mga flood control projects nganing mapanimbag kun siisay an nhagsasagibo nin katiwalian sa mga proyekto kan gobierno.
