Inalmahan kan Malacañang an sinabi ni Bise Presidente Sara Duterte na an saiyang pagbiyahe sa abroad an huli sa suboot pagkadismaya kan mga Pilipino sa abroad sa kamugtakan kan nasyon.
Segun ki Palace Press Officer USec. Claire Castro na mantang an Presidente nagtitinir sa Pilipinas nganing ayuson an mga problema asin labanan an mga anomalya asin korapsyon, an Bise Presidente perming minaluwas sa nasyon para sa personal travel.
Sinabi ni Castro na an perming pagbyahe an bako solusyon sa problema kan nasyon, asin bako man constitutionally mandated na mag-abroad an Bise nganing tuyawon an Presidente o kumbinsihon an publiko na haleon siya sa pwesto.
Dugang pa kan Palace Press Officer na kun mahale an Presidente, an mayor na benepisyaryo digdi iyo an Bise Presidente.
Ipigdoon man niya na an personal na pagbyahe an perming igwa nin personal na katuyohan.
Mientrastanto, nagtao man nin reaksyon an Palasyo sa pahayag kan Bise Presidente na preparado siyang magpaliwanag sa magkakanigong forum sa paggamit kan saiyang confidential funds.
Segun ki Castro, dapat kuta na ipinaliwanag na ini sa Commission on Audit (COA) kan mag-isyu ini nin Audit Observation Memorandum, asin bago pa man ini makaabot sa notice of disallowance.
